អន្តរជាតិ៖ ក្រសួងការបរទេសហ្វីពីនបានប្រកាសថា ហ្វីលីពីន និងសហរដ្ឋអាមេរិកនឹងមាននូវកិច្ចសន្ទនាមួយដែលគេហៅថាជា កិច្ចសន្ទនា​ «2+2» ដែលជាជំនួបរវាងរដ្ឋមន្រ្តីការបរទេស និងរដ្ឋមន្រ្តីការពារជាតិនៃប្រទេសទាំងពីរ ដែលគ្រោងធ្វើឡើងនាថ្ងៃទី៣០ ខែកក្កដាខាងមុខ។ 

បើតាមសេចក្តីថ្លែងការណ៍របស់ក្រសួងការបរទេសហ្វីលីពីនបញ្ជាក់ថា រដ្ឋមន្ត្រីនៃប្រទេសទាំងពីរ ត្រូវបានគេរំពឹងថានឹងពិភាក្សា និងបង្កើនការប្តេជ្ញាចិត្តរៀងៗខ្លួនចំពោះសម្ព័ន្ធភាពរវាងប្រទេសទាំងពីរ "ក្នុងការគាំទ្រដល់សណ្តាប់ធ្នាប់អន្តរជាតិផ្អែកលើច្បាប់ ការពង្រឹងទំនាក់ទំនងសេដ្ឋកិច្ច វិបុលភាពទូលំទូលាយ និងដំណោះស្រាយចំពោះការវិវត្តនៃបញ្ហាប្រឈមសន្តិសុខក្នុងតំបន់ និងពិភពលោក"។ 

រដ្ឋមន្ត្រីការបរទេសអាមេរិក លោក អាន់ថូនី ប្លីងខេន (Antony Blinken) និងរដ្ឋមន្ត្រីការពារជាតិអាមេរិក លោក ឡយដ៍ អស្ទីន (Lloyd Austin) នឹងជួបជជែកពិភាក្សាជាមួយសមភាគីរដ្ឋមន្ត្រីការបរទេសហ្វីលីពីន លោក អាន់រីក ម៉ាណាឡូ (Enrique Manalo) និងរដ្ឋមន្ត្រីការពារជាតិហ្វីលីពីន លោក គីលបឺតូ តេដូរ៉ូ (Gilberto Teodoro) ដែលជានេះកិច្ចសន្ទនាកម្រិតខ្ពស់លើកទីបួនហើយ ចាប់តាំងពីកិច្ចសន្ទនាកំពូលនេះបានចាប់ផ្តើមដំណើរការកាលពីឆ្នាំ ២០១២។

គួរបញ្ជាក់ថា​ កិច្ចពិភាក្សានេះធ្វើឡើងត្រឹមតែជាងមួយខែប៉ុណ្ណោះ បន្ទាប់ពីមានការផ្ទុះឡើងនូវភាពតានតឹងរវាងហ្វីលីពីន និងចិន ជុំវិញបេសកកម្មរបស់ទីក្រុងម៉ានីលដែលបានដាក់ពង្រាយទ័ពឡើងវិញនៅលើទីតាំងដែលមានទំនាស់ក្នុងសមុទ្រចិនខាងត្បូង៕